桐花文學
發布日期：113-12-26
更新日期：114-01-20
客語組短篇小說類 優等 張捷明 刀嫲山風雲
四月北風水打杈1，刀嫲山2个天頂陣光陣暗，不時傳來「轟隆轟隆3」得人驚个雷公聲。重鈂鈂4个雲嚇走天底下个七種色，烏疏疏5个山頂，伸著6五月雪獨占一山白，跈等7就浩洪斗雨8千軍萬馬，盡像玉皇大帝摎耶穌在天頂爭天下。
1.風，掃過千山頂，山頂有一間老屋，屋頭前个鎮風石頂高，鏨等9兩隻深溝大字──硬頸。在這位絡食，田靠牛砸，山靠刀嫲，故所山就安到刀嫲山。這央時个天地中，做得摎萬斤沉雷相𢯭頭10个，只有從老屋肚傳出來──久久正一下──棋子摎棋子輕輕仔相𢼛11个聲。在這風合雨爭天下个時節，山崎下个打㪐角橋12，同時出現兩個人影，在香絲樹个樹影下一前一後行往上，緊行緊兼老屋，面容緊來緊真。
烏雲摎老屋四圍个遠山、近樹、地泥、還有幼幼黃色畏羞个香絲樹花，總下畫成深深淺淺个各種火灰色，連天頂緊拚拚徙動个雲景，乜變成烏摎灰攪共下又攪毋勻个爛布色，分風拉等，跑馬作浪走一路過。唯一清楚个、淨俐个、分人在緊張中做得略略仔放襛神經个，係老屋背該頭油桐花。毋過，經過這場風合雨，樹頂淨伸13幾蕊愛天光日正會開个花苞白在風中搖擺，正放襛一息个心情又烏陰起來。
雨還緊落，看起來老屋頭前个這兩儕人，怕無想共下行个樣仔，一前一後保持成丈遠个距離，在雨中向老屋行兼。頭前該儕著一身舊簑衣、頭戴一頂爛笠嫲，毋過，一片肩胛上个鬃毛14異像15分人拔忒一把，還看得著內肚个一節衫袖，爛笠嫲遮毋揫該隻空，雨水慢慢滲入16內肚。
佢一定當冷──毋過，佢這下个面啾紅，紅過關公，流過面上个雨水強強會沖煙滾起來，還不時使眼角，偷偷仔提防後尾該儕人偎兼。
跈到後背个另一儕人，擎一支壞遮仔，急風推斜雨，打到佢砉冷17个面上，水順等厥嘴角流往下，情像會結冰个樣相，該豬肝色个面像烏面張飛，無寒乜會分人顫18三下。
佢看着頭前儕在柵仔門口停下來，佢乜跈等頓恬，本本保持成丈遠个警覺距離，單淨用目珠掃過禾埕內肚，佢應該當想見屋肚个主人。毋過，頭前隔等一個得人腦个人就像隔等一座山，這個烏面張飛，佢愛耐心等，等紅面關公个下一步仰般行。
屋肚久久一聲棋子相𢼛个聲在雨中傳出來，應該有人在。
「得福伯！得福伯！」頭前个紅面關公開聲喊。
「係麼儕？門無搭，自家入來。」
「係𠊎啦 ! 阿炎仔！」
義歪～一聲，頭前面紅紅个阿炎仔，打開禾埕外背个柵仔門就行過禾埕，雨恁大，佢逕直行到屋簷下，脫下爛空个簑衣挽好勢，轉身打開廳下門行入去。
2.這間屋係得福伯个老屋，從厥公手仔就歇到這，雖然係山頂人家，毋過「貧居鬧市無人識，富在山中有遠親」，出入上下个鄰舍總會入來食杯茶、坐一下。
其實得福伯並無好額，係因增佢三代人熱心、決節、好頭腦，一直受地方人敬重，庄頭个大細事，從契紙詏數、冤家羅債；到牛相鬥、狗相咬，抑係左片隔壁个烏雞公，打毋著19右片鄰舍个黃雞嫲，甚至到雞卵分毋平；這種種解決毋下抑係打毋堵好个参兩事20，來尋得福伯準無差，見了面，好話一話21、背囊一搭，差毋多就解決七成，三見面22挲加兩下就圓圓滿滿，天大个事乜地下合煞23。
就拿山路崎尾該板打㪐角橋來講就好，該條河壩大概丈零闊，探有一板聯絡兩庄个橋，兩片庄頭个牛仔，都會放佢在該河壩兩片脣食草。十年前該擺，毋知仰般，一片个牛索嗄來打㪐，食草食過界，堵好兩片都係雄繃繃 24好鬥个閹仔25嗄來起性，毋係還細个生牛仔鬥好搞26喔──係閹仔，就愛行過橋頭該下，兩條牛仔目珠起赤沙，企到兩片个橋頭，前腳略跍27、屎朏翹起，牛頭開始沉往下，看起來兩條牛相看毋合眼囉，續下來牛角對牛角打平向往前，兩條牛个腳開始緊蹶──「雞公相打胸對胸，牛牯相鬥鬥過壟；皇帝相打爭天下，阿妹相打爭老公。」閹忒還會發肉雄，實在喔。
掌牛哥仔還細毋知死，一看壞蹄咧，走等過去抓着牛尾就拉，就驚手一放牛仔就會相鬥打㪐角，毋過，人恁細牛恁砸28仰般奈得佢何，掌牛哥仔緊噭緊喊：「阿爸！阿爸！～」還緊分牛牯拖等走，後背个大人聽着噭聲，喔喔喊喊29逐等過來出手就拉──毋係拉牛仔，係拉細人仔，牛恁砸喊阿爸來乜共樣！喊阿公來乜無法！就算加十儕大人乜照樣奈牛毋何，等手一放，兩條好鬥牛呼呼滾一偎兼身角對角就鬥起來，四圍做田事个人擎钁頭个擎钁頭、擎擔竿个擎擔竿圍兼來，想愛摎牛毆畀開又毋敢兼身，嚇到面挾青30無結無煞。兩隻牛頭闍來闍去31，每一下牛角相搉32个聲，心肝就愛痛三下，一條牛當過一付身家，幾甲田地全愛靠該條牛。好得得福伯堵好在該過，看著拖到地泥下个牛索，開聲就喊：「拉牛索。」兩片个大人正魂醒過來，煞煞探手拈起牛索出力就拉，得福伯又：「voˋ～」長長聲緊喊，喊相鬥个牛仔恬靜下來。好得有得福伯恁煞，兩條牛乜怕闍懶矣33（eˇ 了），係無，看等就會打㪐角，無定著連牛命就無。
得福伯又教掌牛个細阿哥仔講：「下二擺堵著事情愛有要領，毋好牛頭毋捉捉牛尾34」。下後該條橋就分人喊做「打㪐角橋」，大家更加敬重得福伯。
3.管佢屋外背天年各變，老屋肚自成一世界，落雨天屋肚有兜仔暗，光線從窗門入來，該窗門下有一張千年桐做个老桐樹桌，桌頂放等一付棋盤，棋盤頂个棋局既經兵少將損，看起來楚漢相爭怕異多年矣，雖然既經係殘局中个戰爭，毋過，到今還吂見輸贏，雙方神經越勢弓緪，全毋敢放襛半下。壁上貼一張字墨「晴耕雨讀」，鐵筆度墨汁透過紙背。棋盤面對面坐等兩儕人，一片就係這間屋个主人──得福伯，額角光頂光頂，一看就係用頭腦作戰个人，另一儕生來目珠窟當深，佢係一身硬骨毋認輸个阿妹伯，兩片楚河漢界各占半壁江山。脣口還坐等一儕人──毋好講話个阿忠叔公，佢恬恬仔企高崗看馬相踢，在脣口看人行棋。這下，棋盤面舉頭三尺內个空氣，盡像結了冰，真久無聽着棋子打棋子个聲。
得福伯對自家个棋路本來有七分自信，毋過這擺無共樣，阿妹伯毋係普通腳士，麼儕堵着佢，自家就愛知自重，盡好就煞煞先將自信收起三分囥到地窖下。
論起阿妹伯無人毋識，佢毋係麼儕，佢就係這刀麻山山下打㪐角橋脣盡硬程个耕田儕，厥字典肚從來無「認輸」這隻字。有一年翻耕禾35種作，毋知奈種殺蟲農藥合毋著除草劑，一大份青凜凜36个田，三日後續來燥到淨淨，這係大消息，一庄肚个人都圍過來笑佢老耕種跌落馬37，一時間大人教細子、上屋教下家，準做係耕田種作个負面教材。
當時圍過來个只有一儕人無笑佢──該就係阿忠叔公，阿忠叔公無講幾多句話，佢淨摎阿妹伯𢯭38做膽講：「毋怕！」。
看着田肚無半點青，阿妹伯無閒譴乜無閒懊惱，既經失忒半年糧，毋想又再加一擺㧒忒自家个志氣，目珠無加𥍉39半下，就企到田脣兩公婆打合40，屈指緊算，跈等就決裁，厥餔娘上街市，等到該下晝黃禾頭推推平，就將餔娘買轉來芥菜籽點41落去，兩隻月後歸庄人還在該無閒割禾，佢既經早算便節氣，在市場肚賣菜矣。神仙打鼓有時錯，阿妹伯該年失手打差藥仔，危機換逢轉機，顛倒賺加一節錢。
4.得福伯無離開棋盤，淨目珠睞一下42看起來面紅濟炸43性爆爆仔44个阿炎仔，問一聲：「失禮！仰般形係無？伸45幾步棋定定，先坐，自家停茶46。」阿炎仔本旦想開嘴講話，毋過看着這兩個老棋仙戰況激烈，得福伯一時間怕無心性47按內48佢，佢想，莫打壞人个興頭，將就急事寬辦，就應講：「做汝無閒毋怕，入來寄雨49定定，先看汝行棋。」又摎阿妹伯、阿忠叔公相借問，正自家兜張凳仔，坐到得福伯後背看起啊來，聽起來大家真孰事个款。
毋知係戰局氣氛忒緊張，抑係得福伯手巴掌生毛──「老郎50」──心肝肚有打算，譴到像火著个阿炎仔，䟓工51來到這，竟然無影響這場重要戰爭，棋局續等進行。
窗門外，天烏忒一半，刀嫲山天機難測，打㪐角橋殺氣直透天頂。窗門肚，看起來儕儕和和挼挼，其實係心肝肚輸贏作戰，顛倒棋盤頂雙方个棋子，看起來相㓾52鬥打既經戰到斷手斷腳損兵折將。其實，這全係人个安排，等棋局結束，烏色摎紅色雙方个棋子收共下，從來就毋識聽麼儕講，佢兜還會在盒仔肚冤家羅債53。
這步棋輪著連贏兩盤个得福伯。毋過，佢這擺棋逢對手，堵着高明先生矣。
汝仰會知？
仰會毋知！
春看山頭冬看海口，汝看厥嘴抿等，兩粒目珠仁緊捩，將棋盤看過一遍又一遍，還毋知愛仰般差兵點將。佢一隻手跍等54桌唇，另一隻手緊摸下頷55，毋知㨎斷56幾多條鬚，就像天公伯安排天時共樣恁難──到底愛三月三日雨，蓑衣笠嫲矺到死57？抑係愛三月三日晴，蓑衣笠嫲好上棚？難。
窗門外背雨打桐花山，一蕊一蕊个桐花，分急風吹、雨線打，跌一樹下白，水落到魚仔強強會上高坪。
過了盡久，佢正將蛇頭指58輕輕仔撳等「烏馬」，得福伯怕係愛出「烏馬」哦！
5.麥麥風又聽門口有人喊：「得福伯！」
「麼儕？門無搭59，自家入來。」庄下人就恁仰，有人喊，總係挷長聲頦大聲應外背个人客。
「係𠊎！阿文牯啦。」
柵仔門又義歪～一聲，廳下半揞个門打開，入來一儕人，就係頭下行後背个「烏面張飛」阿文牯。
「先入來，雨恁大門關等，莫潑着雨。」山肚人个門雖設毋常關，關門毋係閃客，係愛遮風避雨，故所關門無搭門，上下路過个人還係做得隨時入來坐。一般庄下人家，由外背入到廳下，會有三道門：禾埕盡外背係柵仔大門，晒榖晒菜期間隔開雞鴨，行過禾埕內肚愛入廳下門，還會有兩扇毋會影響視線 ──囊腰仔恁高──矮矮簡單个柵仔門，柵開內外摎狗貓雞鴨，再入來正係廳下大門，日時頭毋會關，隨時歡迎隔壁鄰舍上下入來分主人奉茶，到愛睡目抑係發大風落大雨愛避雨正會關起來。
得福伯目珠看轉棋盤，又問一聲：「恁失禮！坐，請自家渟茶，仰般形？ 恁堵好佢乜正到。」得福伯講个佢係指阿炎仔。
阿文牯想講話，毋過看著死對頭阿炎仔就坐到得福伯後背，毋知佢仰般投得福伯，看著得福伯當臨戀戰，乜低言細語輕輕仔講：
「無啦！相堵的60，摎佢小可相打定定，有桌面就有桌腳。」該隻「佢」就係指頭下正入來个阿炎仔。
人不可面相，海水難用斗量，阿文牯冷冷个面嗄61講出軟軟个話，尤其該句有桌面就有桌腳係麼个意思？小可相打仰又會打到這般形？莫怪喔！挷壞蓑衣拌壞遮62！一個譴到面紅紅來投得福伯，一個像老鼠仔堵著貓，跼到63像細心舅仔樣，看兩儕个面看毋出麼儕毋著在先。
「哦！仰般會相打喏？有要緊無？」得福伯這下正臥起頭先按內64關心一下。
阿炎仔目視視仔65愛噭毋得嘴扁，在得福伯頭前本來忍等吂想發譴个，毋過，聽著阿文牯開嘴，話毋講毋明、火毋點毋著，阿炎仔譴到結舌開嘴講一句：「嗄只？佢⋯⋯。」，佢開始變面囉，紅炣紅炣个面變到啾紅。
「本來就係，上流下出。」阿文牯由由仔66又接等講。上流下出？又係麼个？
「毋怕，先看汝兜行棋。」阿文牯無愛打壞得福伯兩儕行棋子个興意，莫吂開嘴就先輸第一步，贏面嗄變輸面，故所先忍等。
「牙齒摎舌嫲較好乜會毋堵好咬囓，上家下屋左鄰右舍，大家還愛幫𢯭來幫𢯭去，親不親故鄉人啦！」得福伯開嘴話67。
分得福伯一話，阿炎仔還想解釋，阿妹伯也講話矣：「哎！爭天下毋爭鄰舍～」還牽聲打碓挷長聲。
確實啦！山頂人，天做屋頂山做楯，上家下屋左鄰右舍就像共屋下人，都係命運共同體，只有扛等來做，正有本錢面對艱難个大自然，一盞火點毋紅一片天。
阿炎仔一時無話好應，無麼个甘願，毋過，佢本旦就火灰性68，又面對眾人尊敬个得福伯，只好順勢仔講：「毋怕毋怕，等下正講無相干。」得福伯為着棋局，竟然摎阿妹伯聯手四兩化千斤。聽起來大家都係熟識个老鄰舍，做麼該會相打，就毋使再過問矣。相借問後，阿文牯也自家兜張凳仔，坐到阿妹伯後背看人行棋。
講起相打，阿炎仔摎阿文牯各有一肚屎怨氣，毋過，比起行棋，相打算麼該。坐對中一直毋講話个阿忠叔公這下開嘴矣：「係哪！鄰舍毋相爭，爭棋盤。」
風急雨斜打入窗門下，盡像一千隻山豬飆過大山排，一山个硬骨桐花臥頭69摎雨相爭。在山崎上有㧡擔70个人起腳走，肩胛上个擔竿 ngid ngad ngid ngad71響，在這敧崖石壁个山肚摎天相爭，手腳愛緊腳步愛在72，做得分雨涿濕頭那73，做毋得分擔竿矺彎74硬頸。
6.這下棋盤上大家目金金仔緊看棋盤頂，得福伯怕還係愛出「烏馬」哦！
除忒得福伯自家，大家心肝肚全適該想：「無可能。」尤其係坐到得福伯後背看人行棋个阿炎仔當緊張。因為「馬行日字」，係愛行該日字斜角，頭前有「紅炮」卡馬腳，會「馬仔劈腳」，係愛行左片打橫个日字，又會堵著「車行直線」，遠遠就有一隻「紅俥75」等適該，係愛退轉來，又堵着「象行田字」，會分「紅相」食忒。得福伯這下可能乜想著這點，故所佢放下「烏馬」，手輕輕仔擎起來，想愛馬前換將。
棋盤頂，前無去路後有追兵寸步難行，窗門外背粒粒雷公打向桐花山。風合雨76緊落緊大，到底係吂驚蟄先響雷，這下正會四十九日暗垂垂77？抑係一龍治水風調雨順，九龍治水旱潦不均？
後背个阿炎仔透一下大氣，毋過，得福伯該隻手指又本本撳轉「烏馬」。
這下換阿文牯个嘴弛開來，嘴角吊往上，佢暗暗摎阿妹伯𢯭暢。該片个阿炎仔嗄急到用腳緊踢得福伯个凳腳，想暗中打消息78。正經係皇帝毋急急死太監。
山上人娛樂少，發風落雨做事毋得，毋係讀書就係行棋子，這下阿炎仔摎阿文牯，堵著行棋七好過八，在棋盤頭前，嗄毋記得自家係麼儕，連火燒山就怕還愛等一下，奈會搭得自家䟓工愛來做麼个。
上晝落雨斷人糧，下晝落雨斷牛草，落雨天安排生事無恁該。棋盤頂得福伯个心肝裁裁踏踏79無一個結節80，阿妹伯个心肝乜適該倒去倒轉，佢捉算得福伯个棋路摎下一步可能个行法。楚河漢界這條土牛溝81个前方，兩儕心肝肚作戰，看起來怕相打毋過田脣82，土牛溝後方，兩片各扶其主，半斤八兩。
雨較過一息仔矣83，老古人講：「濛得開，出日頭，濛毋開，落大水。」下一步棋个輸贏，就看得福伯个造化。
得福伯个手指公摎崠指84，慢慢仔伸出來憑等85棋子，三隻手指，慢慢仔愛摎棋子拿起來。阿炎仔適得福伯後背，輕輕仔用手㬹86緊揬87得福伯个背囊，嘴上細細聲仔緊吩咐：「『車仔88』！『車仔』！」意思係喊得福伯出「車仔」。阿妹伯眼睛睛89緊看緊想，厥後背个阿文牯乜緊頷頭，鼻公還緊發出：「哼！哼！」个冷笑聲，意思係講：「好啊！出『車仔』啊！狗頭軍師！這擺汝倒棋哩！」阿文牯認定阿炎仔係狗頭軍師，怕毋記得行棋个主角得福伯係佢盡敬重个人。阿炎仔摎阿文牯冤家，係毋係能化解，到底係愛看得福伯个輸贏？抑係愛看自家造化？到底觀棋者會影響大局無？
得福伯思前想後，怕想堵采行一步險棋，佢輕輕仔摎棋子放到左片打橫（vangˇ）个日字該隻角。
係毋係旁觀者清，當局者迷？
無人知！
得福伯手還搬等旗子吂擎起來90，阿炎仔个嘴就既經忍毋歇唉唉唧唧緊講：「還硬頸，全毋聽人講。」
「日頭雨，晒糯米，晒毋燥，轉去摎汝餔娘91攬腰跤92。」天頂个爛布雲正開一隻天縫，窗門外背个細人仔看著出日頭花93，在禾埕開始唱起阿公教个童謠。無想著怕係天公伯聽着，跈等又落起雨毛屑94來。
7.阿炎仔噥噥噥噥95，阿忠叔公細細聲罵佢：「三隻鼻公一隻閒管。」
看人行棋，盡難个係一隻「忍」字，毋過，阿忠叔公嘴盡謹96，知自家係觀棋者，就算心肝會癢癢扡扡還係知結節97。
該片爿个阿文牯，一隻手拳頭嫲揢等，緊打另一隻手个巴掌嫲，嘴上細細聲仔緊咒講：「手放忒！手放忒！」
得福伯拿棋子該隻手，手指公摎崠指正經想放開棋子，蛇頭指正愛擎起來，想想又無麼个著，手指公摎崠指又本本憑轉去，正想摎棋子拿倒轉來。
「起手無回大丈夫！」莫看阿文牯頭下挶到像細心舅仔，這下佢忍毋歇大大聲喊。
阿炎仔聽着佇毋著98，也大大聲應轉去講：「觀棋不語真君子！」
阿文牯講：「汝罵自家！」
阿炎仔應講：「先講个先分人罵。」
阿忠叔公聽着佇毋著，用目珠翕99佢兩儕罵講：「算來係麼人行棋，看人食燒粥──唇口𢯭喊燒。」兩儕正恬靜下來。
扶明扶暗各為其主，這兩儕看着棋子像看着命，既經毋記得自家身係客，頭下在得福伯个關心下，舊恨正愛放水流，無想著看一盤棋又來起干戈100，牛就係牛，牽到廣東還係牛，在得福伯面前，角還係會鬥㪐。
盡包尾得福伯總算有一個決節，心肝挷緪換另一步棋，該隻「烏馬」本本適「紅俥」該條線上。
毋過，阿妹伯無跈等用「紅俥」食佢，佢左看右看、前思後想，仰恁好个事腹101，天頂會跌下一個禮物，白白送一隻「馬」分佢，這下換佢愁，驚有陷阱，久久毋敢決裁。
高手行棋就係恁仰，一步棋吂行，盡少乜愛展前看有三步五步以後个發展，做毋得鴨嫲顧搶食毋知坑窮。
佢像修行个師父共樣，深深个目珠窟底肚像囥等千百條計，佢坐正來想，一隻手放到桌頂，一隻手放到膝頭帕頂高，勻勻仔㪗氣102、定定仔愐計103。適佢个心肝肚乜放有一垤棋盤，該棋盤放等摎桌頂共樣个棋子，無共樣个係，桌頂一步棋吂行，佢心肝肚該盤棋，既經行過千條水萬重山。毋過佢這下還看毋出得福伯這步棋个奧妙。
高手鬥法，毋知係牛先死？抑係藤先斷104？阿文牯可能毋係高手，因為佢既經忍毋歇又大聲喊講：「『將軍抽馬』！『將軍抽馬』！」
怕係旁觀者清當局者迷，阿炎仔乜忍毋歇應佢：「汝係『將軍抽馬』，𠊎就『雙包將』。」
濫濫馬乜有兩步踢105，阿文牯跈等也應講：「𠊎還有一步『馬後砲』。」
外背个陰陽雨106一陣停一陣落，打到桐花跌到一地泥。棋盤脣口擂戰鼓个人，顛倒比行棋个人還較煞猛。
阿炎仔跈等應轉去講：「𠊎『炮仔盤山』，食若『紅帥107』。」唇口个阿忠叔公看這兩儕「皇帝毋急，急死太監」，譴到用目珠䁯佢兩儕，兩儕又正肅恬108。
外背个雨暫停下來，毋過遠遠个空心雷還係一聲接一聲，全看毋識天機，到底愛落抑係愛晴？就驚半年無水落，一落半年水，這天公伯做事，真經無人知。雨中个油桐樹尾，只伸幾蕊硬頸桐花向天笑，摎一地泥佬等泥漿个白。
8.阿妹伯想仔恁久，想定著矣109！這下愛出手囉。
佢三隻手指拈起「紅俥」就愛高高擎起，正放停一個雨縫个天頂，麥麥風一陣𥍉爧110滿天光，瞠到111大家目珠擘毋開，分雨打落地泥个桐花，白光射斗劍氣逼人順等電光直透天頂，淨看著阿妹伯手上个「紅俥」順等𥍉爧光飛過「紅相」又飛過楚河，直直飛到「烏馬」个頂高，看準準揜112啊落，嘴上淨喊講：「『將軍抽馬』！『倒棋』！」眾人一下著驚，打蛇打七寸113，阿妹伯深深个目珠窟確實囥等當多計謀，得福伯無步哩。
後背坐个阿炎仔正適該道嘆，枉費佢𢯭出主意。
無想著左片𥍉爧光還吂過，右片𥍉爧光同時照光刀嫲山老屋个窗門下，得福伯厥手竟然比劍還較遽，𥍉爧个光堵堵照見佢伸出个手巴掌，在棋盤頂高形成一隻五爪金龍个烏影，抓起一隻偎114「紅仕」唇口毋打眼个過河卒仔「烏卒」，這擺佢無再過裁裁踏踏115到去到轉116，跈等就大大力打到「紅仕」頂高，同時企起來將左手擎高高對等自家个腳髀搭啊落，順續還摎腳板擎起來蹬一下地泥，比跌三烏仔117還較暢118，大大聲喊講：「『將軍抽車』！『王不見王』！倒棋。」，話吂喊煞又連兩粒雙連雷公「誆誆～！」兩聲共下大大聲，一雷破九颱，嚇到大家險險企毋歇，耳公聾忒還嗡嗡嗡響當久，阿姆哀喲119～這兩粒雷公一粒大過一粒，還大粒！
等眾人回魂再看轉棋盤頂高个楚河漢界。「喔喉120！」打㪐角橋空留恨，黃秧蒔田難轉青。「烏卒仔」既經將「紅帥」逼到無江東之地。刀嫲山刀嫲矺大山，得福伯既經坐穩天下。
還絕121！得福伯「毋聲就毋聲，一聲就打爛罌」122，小卒仔乜做得立大功。窗門外背也總算雨過天晴，一樹桐花伸著一身青。
高手爭天下愛忍、愛看，得福伯等這步棋毋知忍矣幾久矣，忍到玉皇大帝个風無力、忍到耶穌基督个雲無雨、忍到雷公總算鳴金收兵，連東土摎西天个兩位天公伯就毋使爭，最尾還係分日頭拈着最後勝利。刀嫲山風雲就恁仰正式收山。就像桐花摎天時相爭，今晡日个桐花逢今晡日个雨，面對新个天光日，照樣再開一山新个白雪桐花。
山上人面對天公伯摎大自然个考驗毋驚辛苦，就單淨驚牛欄肚鬥牛嫲。棋盤頂做得爭輸贏，摎天相爭就淨做得爭一口飯食。講着人摎人實在講無麼个好爭，就像這桐花山還有盡多恬恬仔開花無人注意个香絲樹，從來只摎天爭毋同桐花爭，佢共樣在土石中企穩腳步年年開淰黃个細花。
「啊！屎朏就險險坐痛，這場雨總算落停，有水好蒔田囉。」天公係毋落水，耕種人就愛輪水巡田脣，係堵着大天旱，驚汝係麼个阿叔阿伯，一下無堵好就會爭水相打，毋係儕儕就像得福伯，像會屈指算。得福伯像孔明，東風借雨涼勢呀涼勢，淨嫌坐久屎朏會痛。
「係啊！再毋落水，吾秧苗強強會黃忒，𠊎愛遽遽轉去先準備秧箕、秧盆、秧鏟。得福伯！天光日先來摎𠊎換工好無？等吾田蒔忒跈等就換若123，連上擺欠汝个三工人正做一下做還汝。」阿妹伯向得福伯拜託。事毋使爭先做後做，總係，愛扛等來做正會遽。
9.兩儕摎棋子整理好勢準備愛收起來。
「得福伯！」兩儕正愛䟘凳，毋過，阿炎仔搶先一步企起來喊。
得福伯就還吂應聲，吂知又聽著雷公響，天又暗下來。人驚尷尬，雨驚滲浙124，雨又 bi bi bia bia125毋知愛落到奈央時正會天晴，正經係風性難測雨水難量。
「得福伯！」阿炎仔又喊加一聲。
「𠊎知𠊎知，先泡加一壺燒茶啦！坐加一下，跈等好。」天庭飽滿光頂光頂个得福伯一生人食頭腦，人老心還吂老，佢毋係無鋼个老刀嫲126，記才還摎後生人差毋多恁好，當然記得還一件事𠊎撨好勢。
得福伯拿起茶壺轉身入灶下，該壺釅茶正泡好該下原本係滾个，經過一場大戰早就冷泧泧127矣，毋過，仰般阿炎仔个面，從入來到這下，看等就既經轉冷，今強強又會滾起來？毋係講阿炎仔係火灰性，入來該下分得福伯摎阿妹伯講兩句就過矣乜？算來幾大个冤仇、起恁大个干戈，仰到今氣難消？
等燒茶泡好，得福伯行到窗門邊，看着窗門外又一陣風馳雨，上山做事還毋係頭路。
水打五更頭，行人毋使愁，兩儕將就又坐下來，怕還想愛再創新局喔。
「得福伯！」這擺連看起來像濫濫妮妮128个阿文牯乜忍毋歇矣。
「喔！喔！敗勢，分汝等恁久。頭下仰般講？仰般形相打？打到仰般？講來聽看矣，阿妹伯乜在這，大家共下參詳。」有得福伯阿妹伯共下，先莫講上流下出129、桌面桌腳130个小可事，只愛莫斷131人个喉嗹132，連天下都做得扛等來打，還有麼个解決毋下个。
刀嫲山毋係鈍刀嫲133，打㪐角橋又強強會打㪐角，阿炎仔摎阿文牯兩儕都角惹惹134，像兩條生牛牯135，一聽得福伯開聲問，兩儕心肝肚在前一局棋个忍氣，做一下就覂覂出來136，跋啊䟘凳大大聲共下搶等就講：「換𠊎拚佢一盤。」
附註：
1. 水打杈：地上乾柴都泡在水裡，形容做水災。
2. 刀嫲：柴刀；刀嫲山：一座名字叫刀嫲的山。
3. 轟隆轟隆：音gung lung gung lung。
4. 重鈂鈂：音cungˊdemˇdemˇ；沉甸甸的。
5. 暗疏疏：音am soˇsoˇ；暗灰色。
6. 伸着：音cunˊdoˋ；剩下。
7. 跈等：音enˇdenˋ；接著。
8. 浩洪斗雨：音heˊmungˇdeuˋiˋ；傾盆大雨，一說谿濛斗雨。
9. 鏨等：音cam 鑿；鏨等：刻著。
10.𢯭頭：挑擔時兩頭要等重才好挑，因此， 頭即同等重量或同等份量之義。
11. 相𢼛：音kog ；相碰。
12. 㪐：音ludˋ；脫落。
打㪐角：打架把頭上的角打脫落。
打㪐角橋：這條橋名稱為「打㪐角橋」。
13. 淨伸：音cunˊ；只剩。
14. 鬃毛：製作簑衣的材料，簑衣肩膀上用鬃毛紮成向外伸出狀，好讓手伸出。
15. 異像：很像。
16. 滲入：音zam。
17. 砉冷：音guag langˊ；冰凍霜冷。
18. 顫：音zunˊ；打冷顫。
19. 打毋著 ：音cog；動物配錯對，在此是指左右鄰居的公雞母雞配錯對。
20. 打毋堵好个参兩事：打毋堵好( 人際關係的摩擦) 参兩事( 小事)。
21. 好話一話：話：音va；好話－勸解。
22. 三見面：當事人雙方與調停人，三方見面坐下來談。
23. 天大个事，乜地下合煞；天大的事，也一樣一筆抹煞。
24. 雄繃繃：音bangˇbangˇ；雄性激素旺盛精力十足。
25. 好鬥个閹仔：雄糾糾好鬥的、閹過的雄牛。
26. 毋係生牯鬥好搞：不是尚未閹過的小公牛喜歡鬧著好玩。
27. 略跍：音guˊ；略蹲，即將作勢而起的姿勢。
28. 恁砸：音zabˋ；這麼強壯有力。
29. 喔喔喊喊：音voˋvoˋhemˊhemˊ；大聲吆喝呼喊。
30. 面挾青：音gab；臉鐵青。
31. 闍來闍去：音duˊ；頂來頂去。
32. 相搉：音kog；相碰。
33. 矣 : 如文言文裡「吾老矣，而髮蒼蒼」。
34. 牛頭毋捉捉牛尾：不懂要領。
35. 翻耕禾：音fanˊ gong voˇ；二期稻作。
36. 青凜凜：音qiangˊlimˋlimˋ；綠油油。
37. 老耕種跌落馬：老經驗卻仍馬前失蹄。
38. 𢯭：音ten；𢯭手。
39. 𥍉：音ngiabˋ；眨眼。
40. 打合: 音daˋhab；商量。
41. 點：音diam；播種子。
42. 睞一下：音laiˋ；用眼光掃過一下。
43. 面紅祭炸：臉紅耳赤。
44. 性爆爆仔：個性焦躁衝動。
45. 伸：音cunˊ；剩下。
46. 停茶：斟茶、倒茶。
47. 無心性：沒心思。
48. 按內：招呼。
49. 寄雨：避雨。
50. 手巴掌生毛──「老郎」：客家師父話( 歇後語) 經驗老到。
51. 䟓：音dangˊ；工：專程。
52. 相㓾：音ciiˇ；相互殺伐。
53. 冤家羅債：吵架結仇。
54. 跍等：音ku denˋ；支撐著、扶著。
55. 下頷：音haˊngamˊ；下顎。
56. 㨎斷：音nunˋ；撚斷。
57. 磧到死：壓到死。
58. 蛇頭指：食指。
59. 門無搭：門沒有扣上。
60. 相堵的：音dag；互相口角摩擦。
61. 嗄：音sa；卻；反倒。
62. 拌壞遮：摔壞雨傘。
63. 跼到：裝成。
64. 按內：招呼客人。
65. 目視視仔：瞪著眼睛看。
66. 由由仔：緩緩的。
67. 話：音va；勸解 。
68. 火灰性：易動氣也易消氣的個性。
69. 臥頭：音ngo teuˇ；昂首、抬頭。
70. 㧡擔：挑擔；㧡：kaiˊ。
71. 音ngid ngad ngid ngad；狀聲詞，扁擔挑重物發出的規則吱吱叫聲。
72. 腳步愛在：音cai；腳步要穩。
73. 涿濕頭顱：打濕頭。
74. 磧彎：壓彎。
75. 紅俥：音fungˇ giˊeˋ；紅方棋子。
76. 風合雨：風和雨。
77. 暗垂垂：音am tuiˇtuiˇ；陰暗的天色。
78. 打消息：打暗號。
79. 搓搓踏踏：猶豫不決。
80. 結節：決心、結論。
81. 土牛溝：昔日漢原邊界的界溝。
82. 相打毋過田脣：勢均力敵不相上下。
83. 雨較過一息仔矣：雨勢稍稍緩和一些。
84. 崠指：中指。
85. 憑著：音ben denˋ；靠著。
86. 手㬹：手肘。
87. 揬：音dudˋ；碰觸。
88. 車仔：音giˊeˋ；黑方棋子。
89. 眼精精仔：睜亮眼睛。
90. 搬等：扶著；吂；尚未；擎：提起來。
91. 夫娘：太太。
92. 攬腰跤：摔角。
93. 日頭花：雲縫中偶爾露出的陽光。
94. 雨毛屑：毛毛雨。
95. 噥噥噥噥：喃喃自語。
96. 嘴盡謹：嘴巴最謹言慎行，不輕易開口。
97. 結節：節制。
98. 堵毋著：音du mˇ diauˇ；受不了。
99. 翕：音hinˇ；用白眼瞪人。
100. 起干戈：音gonˊkoˊ；起口角戰端。
101. 事腹：事情、事實。
102. 勻勻仔透氣：緩緩呼吸。
103. 定定仔愐計：慢慢想計謀。
104. 毋知係牛先死，抑係藤先斷：鹿死誰手尚未可知 。
105. 濫濫馬乜有兩步踢：再差的人都會有一些長處 。
106. 陰陽雨：日頭雨、太陽雨。
107. 紅帥：音fungˇieuˊ；紅方主將。
108. 肅恬：寂靜無聲。
109. 想定著矣：想清楚了，下定決心了。
110. 𥍉爧：音ngiabˋlang；閃電。
111. 膛到：音cangˇ；照到。
112. 揜：kiebˋ 蓋下。
113. 打蛇愛打七寸：直取要害。
114. 偎：音vaˋ；靠近。
115. 搓搓踏踏：猶豫不決。
116. 到去到轉：反反覆覆 。
117. 跌三烏仔：五十年前的賭具。
118. 暢：音tiong；高興；還較暢：更高興。
119. 阿姆唉喲：我的媽呀。
120. 喔喉：可惜聲。
121. 還絕：真的是絕頂厲害。
122. 毋聲就毋聲一聲就打爛罌：不吭聲就不吭聲，一吭聲就打破一個甕，寓一鳴驚人。
123. 若：音ngiaˊ：你的。
124. 人驚尷尬，雨驚滲浙：人怕不乾脆，雨怕綿綿不斷。
125. 音bi bi bia bia：下大雨的聲音。
126. 無鋼个老刀嫲：刀口缺口鋼性磨損，失去功能的老柴刀。喻無用的人或過時的專家。
127. 冷泧泧：音langˊvedˋvedˋ；冷冰冰。
128. 濫濫妮妮：沒甚麼脾氣。
129. 上流下出：自然界的水都是公用的，在山上梯田裡，上方水滿就應讓下方的田使用，不可用任何理由阻撓。
130. 桌面桌腳：山上梯田田埂都有相當高度與斜度，就像桌面與桌腳是一整體的，下方田地的人絕不可去挖上方的田埂腳。
131. 斷：音donˋ；阻斷、切段。
132. 莫斷人个喉嗹：水是務農最重要的資源，沒水耕作就等於沒生命，絕對不可仗勢地利之便斷人水源，或仗武力，這也是農居山居最易起爭執的因素。
133. 鈍刀嫲：用久磨損不利的老柴刀。
毋係鈍刀嫲：寶刀未老不容小覷也。
134. 角惹惹：音ngia ngia；頭上的角翹起，喻不好惹。
135. 生牛牯：尚未成年的雄牛。
136. 覂覂出來：音fungˋfungˋ；倒倒出來。
- 瀏覽人次：354
